Canvas ဖိနပ်လေးတွေကို သန့်ရှင်းအောင် ဘယ်လိုထိန်းသိမ်းမလဲ

မဟေသီကို ချစ်တဲ့ သူငယ်ချင်းတို့ရေ။ ဟေလေးက ဒီနေ့တော့ အားလုံးက All Star ဖိနပ်လို့ အားလုံးက ခေါ်တဲ့ Canvas ဖိနပ်လေးတွေကို ဘယ်လိုသန့်ရှင်းအောင်ထားမယ်ဆိုတာ ပြောပြမယ်။

ဟေလေးကတော့ အဲလို ကင်းဗတ်ဖိနပ်လေးတွေဆို ဝတ်ရတာ အရမ်းကြိုက်တာ။ အဖြုလေးတွေဆို အရမ်းလှ။ တစ်ခုရှိတာက အဖြူဆို လျှော်ရတယ်ပေါ့။ အဖြူမှ မဟုတ်ဘူး တခြားအရောင်လဲ လျှော်ရတာပါပဲ။ အဲ သူက အလျှော်မကောင်းရင် ဖိနပ်လေးတွေက နည်းနည်းပုံပျက်တာမျိူး၊ ဖိနပ်ကို သေချာအခြောက်မခံရင် မာသွားတာမျိုးတွေရှိတယ်။

ခုက ဟေလေးက ဒီလိုမျိုး မဖြစ်ရအောင် ကင်းဗတ်လေးတွေဆို ဘယ်လိုသေချာဆေးတယ် ဘယ်လိုထိန်းသိမ်းတယ်ဆိုတာ ပြောပြမယ်နော်။

၁။ ဖိနပ်လေးကို ရေမစိုသေးခင်မှာ ဖိနပ်မှာရှိတဲ့ ဖုန်တွေ အညစ်အကြေးတွေကို အရင် ရှင်းလင်းရမယ်နော်။

၂။ အဲလို ကင်းဗတ်ဖိနပ်တွေကိုလေ လက်နဲ့ ဆေး/လျှော်တာပဲ ကောင်းတယ်။ စက်နဲ့လျှော်မယ်ဆို ဖိနပ်ပုံစံလေးတွေ ပျက်စီးသွားမှာ စိုးရိမ်ရတယ်လေ။

၃။ ဖိနပ်ဆေးဖို့အတွက်တော့

 - ဖိနပ်ဆံ့တဲ့ ပုံး (သို့) ဇလုံ

 - ရေနွေးနွေးလေးရယ်

 - ဆပ်ပြာမှုန့် (ဟေလေးကတော့ E-Lan Ultra ကို သုံးတယ်)

 - ဖိနပ်တိုက်ဖို့ သွားပွတ်တံအဟောင်းလေး

 - နောက်ပြီးတော့ ရေစင်အောင်သုတ်ဖို့ အဝတ်ဟောင်းဖြစ်ဖြစ် သဘက်အဟောင်းတွေ

 - သတင်းစာစက္ကူတို့လိုပါတယ်လို့

၄. ဘယ်လိုဆေးမလဲဆိုတော့

 - ပုံးထဲကို ရေနွေးထည့် E-Lan Ultra ကို တစ်ဇွန်းလောက်ပဲထည့်ပြီး အမြုပ်ထအောင် အရင်လုပ်

 - ဖိနပ်က နှစ်ဖက်ရှိတယ်မဟုတ်လား အစကိုတော့ နှစ်ဖက်လုံးစိမ်ထားလိုက်ဦး

 - သွားပွတ်တံအဟောင်းနဲ့ ဖိနပ်မတိုက်ခင် အရင်ဆုံး ဖိနပ်ကြိုးလေးတွေကို ဆပ်ပြာနည်းနည်းနဲ့ အရင်တိုက်ထားလိုက်မယ်

 - ပြီးရင် စိမ်ထားတဲ့ နှစ်ဖက်က တစ်ဖက်ကို အရင်ထုတ်လိုက် သွားပွတ်တံလေးနဲ့ နေရာအနှံ့လိုက်တိုက်ပေး

 - တစ်ဖက်တိုက်ပြီးရင် ဆပ်ပြာပုံးထဲ ပြန်စိမ် ကျန်တဲ့တစ်ဖက်ကို ပြန်တိုက် အဲလိုလေးပဲ နှစ်ခါလောက် တိုက်ပေး

 - ပြီးရင် ဖိနပ်ကော ဖိနပ်ကြိုးကော ရိုးရိုးရေအသန့်နဲ့ ပြန်ဆေး 

 - ရေခြောက်အောင်လို့ သဘက်အဟောင်း အဝတ်အဟောင်းနဲ့ အရင်သုတ်တာကောင်းတယ်

 - ပြီးရင်လေ ဖိနပ်ထဲကို ခုနက သတင်းစာအဟောင်း စက္ကူကို လုံးပြီး ဖိနပ်ထဲ ထိုးထည့်ထားရမယ်။ ဘာလို့လဲဆို ဒီအတိုင်း ရေခြောက်အောင်ထားရင် ဖိနပ်က ကင်းဗတ်ဆိုတော့ ပြားခြောက်ခြောက်ကြီးဖြစ်မှာစိုးတယ်။ ဖိနပ်လေးပုံပျက်မှာစိုးလို့လေ။

 - နေပူထဲ လှမ်းတာဖြစ်ဖြစ် လေဝင်လေထွက်ကောင်းတဲ့နေရာမှာဖြစ်ဖြစ် ဖိနပ်ကို လှမ်းထားလိုက်ရုံပဲ။ တစ်ခုရှိတာ ဖိနပ်ကို အပူနဲ့ တိုက်ရိုက်ထိတာမျိုး နေပူထဲတောင် အကြာကြီးထားတာမျိုး ရှောင်ရမယ်။ မဟုတ်ရင် အရမ်းပူပြီး ကော်တွေကွာကုန်တာမျိုးဖြစ်မှာစိုးလို့လေ။

ဒါဆို ဟေလေးပြောပြတဲ့အတိုင်း ကင်းဗတ်လေးတွေ All Star ဖိနပ်လေးတွေကို ဘယ်လိုဆေးသင့်တယ် ဘယ်လိုထိန်းသိမ်းတာကို ဖတ်မိပြီး အဆင်ပြေမယ်လို့ ထင်ပါတယ်နော်။

ခုက မိုးတွင်းကုန်ပြီဆိုပေမယ့် ဘယ်ဖိနပ်ပဲစီးစီး သေချာလျှော် သေချာခြောက်တော့မှ စီးပါလို့။

အားလုံးပဲ ဖိနပ်သန့်သန့်လှလှလေးတွေနဲ့ အဆင်ပြေကံကောင်းတဲ့ နေ့လေးတွေ လျှောက်လှမ်းနိုင်ကြပါစေနော်။