အဝတ်ဗီရိုမှာ မှိုစွဲတာက ကြောက်ဖို့ ကောင်းတယ်နော်။ ဗီရိုမှာ မှိုစွဲတာကို မသိပဲ အဝတ်တွေ ဆက်ထားထားမယ်ဆိုရင် အဝတ်အစားတွေထိပါ မှိုတွေက ကူးသွားပြီး ပျက်စီးသွားနိုင်ပါတယ်။ ကျွန်မမှာက ကျောင်းတက်နေတဲ့ သားလေး တစ်ယောက်နဲ့ ဆိုတော့၊ သူ့အဖြူအစိမ်းတွေ တစ်ခုခု မဖြစ်အောင် အမြဲတမ်း ဂရုစိုက်ရတယ်။ မေမေတွေလည်း မှိုစွဲတာကို ဂရုတစိုက်ရှိစေချင်ပါတယ်နော်။

 

ဗီရိုထဲမှာ မှိုစွဲရခြင်း အကြောင်းရင်းကတော့ နှစ်ချက်ရှိပါတယ်။ 

(၁) ပြင်ပက ရေငွေ့တွေကြောင့် ငွေ့ရည်ဖွဲ့ပြီး အစိုပြန်ခြင်း နဲ့ 

(၂) မခြောက်သေးပဲ စိုနေတဲ့ အဝတ်တွေကြောင့် မှိုစွဲတတ်ပါတယ်။ ကျွန်မတုန်းကလည်း ဖြစ်ဖူးတယ်၊ စောစောသိပြီး အမြန် ရှင်းထုတ်လိုက်နိုင်တော့ အဝတ်အစားတွေ ဘာမှ ဖြစ်မသွားခဲ့ဘူး။ မှိုက ထားထားရင် ထားထားသလို အပွားမြန်တော့၊ သိတာနဲ့ ချက်ချင်း ရှင်းထုတ်သင့်ပါတယ်။

 

မှိုစွဲတာကို ဖြေရှင်းတဲ့ နည်းလမ်းတွေကတော့ အမျိုးမျိုးရှိပါတယ်။ ရေချိုးခန်း နံရံ၊ မီးဖိုချောင် နံရံတွေမှာ မှိုစွဲရင်တော့ Mr. Care လို ကြေးချွတ်ဆေးသုံးပြီး ဖြေရှင်းလိုက်ရုံပါပဲ။ ဒါပေမယ့် သစ်သားနဲ့ လုပ်ထားတဲ့ ဗီရိုလိုမျိုးမှာ ဆိုရင်တော့ ကြေးချွတ်ဆေးကို အသုံးမပြုသင့်ပါဘူးနော်။ ဗီရိုရဲ့ ပေါ်လစ် တင်ထားတာကို တိုက်စားသွားပြီး၊ ဆေးကွာတာ၊ အရောင်မှိန်တာတွေ ဖြစ်သွားနိုင်ပါတယ်။ ဒါကြောင့်၊ သစ်သားတွေမှာ မှိုစွဲရင် ကြေးချွတ်ဆေးကို အသုံးမပြုရပဲ အခြား နည်းလမ်းကို အသုံးပြုပေးရပါမယ်။ အခု၊ ကျွန်မက အဲဒီနည်လမ်းကို ပြောပြသွားမှာပါနော်။

 

ဗီဒီုထဲမှာ မှိုစွဲခြင်းကို ရပ်တန့်စေမယ့် နည်းလမ်း

ကျွန်မ ပြောပြမှာကတော့၊ မှိုစွဲတဲ့ နေရာလောက်ကိုပဲ ရှင်းလင်းသွားအောင် လုပ်ရတာမျိုး မဟုတ်ပဲ၊ ဗီရိုထဲမှာ ရှိနေတဲ့ မှိုတွေ အားလုံးကို အရှင်းပျောက်သွားအောင် လုပ်ရမယ့် နည်းလမ်းပါ။ ကြေးချွတ်ဆေးသုံးလို့ မဖြစ်တဲ့အတွက်၊ အဲဒီအစား ဗီနီဂါကို အသုံးပြုပေးရပါမယ်။

 

၁။ မှိုစွဲခြင်းရဲ့ အပြင်ဆုံး အလွှာဖြစ်တဲ့ မှိုနဲ့ အမည်းကွက်က ရှင်းလင်းသွားဖို့အတွက် ရေနဲ့ ဗီနီဂါကို ခွက်တစ်ခုထဲမှာ ရောဖျော်ပြီး၊ မှိုစွဲနေရတွေကို ပက်ဖြန်းပေးပါ။

၂။ ပြီးရင် အဝတ်စ တစ်ခုကို ဗီနီဂါအရည်နဲ့ စိုစွတ်စေပြီး မှိုစွဲနေရာတွေကို သုတ်ပေးရပါမယ်။ သုတ်ပြီးသွားရင် အပေါ်ယံမှိုတွေ လုံးဝ ရှင်းသွားပါပြီ။ ဒါပေမယ့် မမြင်ရတဲ့ သစ်သားအတွင်းထဲမှာ မှိုတွေ ကျန်နေဦးမှာပါ။

၃။ မမြင်ရတဲ့ အတွင်းသားထဲက မှိုတွေပါ လုံးဝ အရှင်းပျောက်ဖို့အတွက် (ရေ မရောပဲ) ဗီနီဂါသီးသန့် ပက်ဖြန်းပေးပြီး၊ ဗီနီဂါ ခြောက်သွားအောင်ထိ ထားထားရပါမယ်။

၄။ ပြီးရင် ရိုးရိုး ရေအေးနဲ့ သစ်သား မျက်နှာပြင်တွေကို စင်အောင် ဆေးပြီး ခြောက်သွေ့တဲ့ အဝတ်နဲ့ ရေတွေ ပြောင်သွားအောင်ထိ သုတ်ပေးပါ။ ဒါဆိုရင်တော့ သစ်သားအတွင်းထဲ မှိုတွေပါ သေသွားပါပြီ။

 

ဒီ အဆင့် (၄) ဆင့်ကတော့ ကျွန်မရဲ့ မှိုတွေကို သုတ်သင်ရှင်းလင်းတဲ့ နည်းလမ်းပါပဲနော်။ မှိုတွေ ရှင်းလင်းသွားပြီဆိုရင်တော့၊ နောက်ထပ် မှိုတွေ ထပ်မဖြစ်လာအောင် သတိထားရမယ့် အချက်လေးတွေကို ပြောပြပေးပါ့မယ်။

     

မှိုသန့်ရှင်းရေး စမလုပ်ခင်၊ အဝတ်ဗီရိုကို နံရံနဲ့ အနည်းငယ် ခွာပေးရပါ့မယ်။ ဒါမှ နံရံကနေ ငွေ့ရည်ပြန်ဖွဲ့ပြီး ဗီရိုတွေထဲကို ရေဓာတ် ပြန်မစိမ့်ဝင်မှာ ဖြစ်ပါတယ်။

     

အဝတ်ဗီရိုထဲမှာ ဘယ်တော့မှ စိုနေတဲ့ အဝတ်တွေကို မထားပါနဲ့။ အဝတ်တွေ ဗီရိုထဲ ထည့်မယ်ဆိုရင်လည်း၊ ခြောက်သွေ့တဲ့ အဝတ်တွေပဲ ဖြစ်ပါစေ။

 

အဝတ်တွေကို ပြွတ်သိပ်နေအောင် မထည့်ပါနဲ့။ အဝတ်တွေ အရမ်း ပြွတ်သိပ်နေတယ်ဆိုရင် အဝတ် အသားတွေကြားမှာ မှိုတွေ ပြန်ဖြစ်လာနိုင်ပြီး၊ ဗီရိုမှာ မှိုပြန်စွဲသွားနိုင်ပါတယ်။

 

ကဲ.. ဒီနည်းလမ်းတွေကတော့ မှိုစွဲတာနဲ့ ပက်သက်ပြီး ကျွန်မ လက်စွဲပြုထားတဲ့ နည်းပါပဲ။ မေမေတို့လည်း ကိုယ့်အိမ်က ဗီရိုမှာ မှိုစွဲရင် ဖြေရှင်းလို့ ရအောင် မှတ်ထားသင့်တယ်နော်။ ဒါမှ အင်္ကျီ အဝတ်အစားတွေမှာ အထိအခိုက် မရှိမှာ။ ဒီလို မှိုစွဲတာက အစိုဓာတ်ကြောင့် အဓိက ဖြစ်တတ်တာမို့ မိုးရာသီရောက်ရင် ပိုပြီး သတိထားသင့်ပါတယ်နော်။ အခု မှိုရှင်တဲ့ နည်းလမ်းလည်း ရှိနေပြီဆိုတော့ မှိုစွဲတာကို သိတာနဲ့ ချက်ချင်း ရှင်းထုတ်ဖို့ ကျွန်မက အထူး တိုက်တွန်းပါတယ်။ ဒါဆို အဝတ်အစားတွေ ထိခိုက် ပျက်စီးမှာ စိုးရိမ်စရာ မလိုတော့ပါဘူးနော်။ သားသားမီးမီးတွေလည်း လှလှပပလေး ကျောင်းသွားနိုင်ပြီပေါ့။