ကိုယ့်အိမ်အသစ်ကို သန့်စင်ရှင်းလင်းနေအောင် ဘယ်လို ထားသင့်သလဲ?

သိတယ်မှတ်လား။ အရင်က ဟေက အမတွေနဲ့ နေခဲ့တာ၊ သူတို့တွေက သိပ်ပြီး အသန့်ကြိုက်တယ်။ ဒီတော့ ဟေလည်း သူတို့နဲ့ပေါင်းပြီး ကြာတော့ အသန့်ကြိုက်တတ်လာတာပေါ့လေ။ အရင်တုန်းကတော့ ဟေကသူတို့နဲ့ အတူတူနေ၊ အငယ်ဆုံးလည်း ဖြစ်တော့ ကိုယ့်နေတဲ့နေရာလောက်ပဲ သန့်သန့်ရှင်းရှင်းလေးထားရင် ရပြီ။ ဒါပေမယ့်၊ အခုတော့ အဲလို မရတော့ဘူးပေါ့၊ ဘာလို့လဲဆိုတော့ ဟေက ကျောင်းပြီးလို့ အလုပ်တစ်ဖက်နဲ့ ဖြစ်လာတော့၊ ကိုယ့်အခန်းနဲ့ ကိုယ်၊ ကိုယ်ခြေထောက်ပေါ် ကိုယ်ရပ်ဖို့ ဖြစ်လာရပြီလေ။ ကိုယ့်အခန်းနဲ့ ကိုယ်နေရတော့မှာဆိုတော့ တစ်ခန်းလုံးကို သန့်ရှင်းရေးလုပ်ဖို့ ကိုယ့်တာဝန်ဖြစ်လာတာပေါ့။ အခု ဟေ့ရဲ့လောလောဆယ် အသုံးပြုတဲ့အိမ်သန့်ရှင်းရေး နည်းလမ်းလေးတွေကို share မယ်နော်။

 

၁။    မျက်နှာကျက်ကနေ စလုပ်ပါတယ်။

ဘာလို့လဲဆိုတော့၊ ကြမ်းပြင်ကို သန့်ရှင်းရေးလုပ်ပြီးမှ မျက်နှာကျက်ကို သန့်ရှင်းရေးလုပ်မယ်ဆိုရင်၊ မျက်နှာကျက်က ကျလာတဲ့ ဖုန်တွေ၊ အမှိုက်တွေကြောင့် ကြမ်းပြင်က ပြန်ပြီး ညစ်ပတ်သွားနိုင်တယ်လေ၊  နှစ်ခါမောခဲ့တဲ့ ဟေ့လိုအဖြစ်မျိုး မကြုံစေချင်လို့ ပြောပြတာပါ။ မျက်နှာကျက်ကို စပြီး သန့်ရှင်းရေးလုပ်မယ်ဆိုရင် ဟေက ပန်ကာတို့၊ မီးချောင်းတို့၊ မျက်နှာကျက်ထောင့်တွေကို အရင်လုပ်တယ်၊ ပြီးသွားတော့ နံရံကိုလည်း အပေါ်ကနေ အောက်ကို တစ်ဆင့်ချင်း ဆင်းလာတဲ့ ပုံစံနဲ့ လုပ်ပါတယ်။ အားလုံးပြီးသွားတော့မှ ကြမ်းပြင်ကို စပြီး ရှင်းလင်းရေး လုပ်ရပါတော့မယ်။

 

၂။    အိမ်အဝင် တံခါးနဲ့ အဝေးဆုံးနေရာကနေ စတင်ပါတယ်။

ဒါကလည်း အကြောင်းပြချက်ရှိပါတယ်။ ဥပမာ - တံခါးနဲ့ အနီးဆုံး အိမ်ရှေ့ကို အရင်သန့်ရှင်းလိုက်မယ် ဆိုပါစို့၊ အဲဒါပြီးတော့မှ အိမ်နောက်ဖေး၊ မီးဖိုချောင်ကို သန့်ရှင်းမယ်ပေါ့။ အဲဒီမှာ ပြဿနာရှိလာနိုင်တာက မီးဖိုချောင်သန့်ရှင်းနေရင်းနဲ့ အိမ်ရှေ့ကပစ္စည်းတစ်ခုခု လိုလာတာပဲ ဖြစ်ဖြစ်၊ အမှိုက်ထုပ်ကို အပြင်ထွက်ထားရတော့မှာပဲ ဖြစ်ဖြစ်၊ ညစ်ပတ်နေတဲ့ ခြေထောက်ကြီးနဲ့ အိမ်ရှေ့ကို ဖြတ်လျှောက်ရမယ်ဆိုရင်တော့ မမတို့ ပင်ပန်းသွားမှာပေါ့လို့။

 

၃။    ရေချိုးခန်းနဲ့ အိမ်သာ

အခု ဟေနေတဲ့ တိုက်ခန်းအသစ်မှာက ဘိုထိုင် အိမ်သာ ဖြစ်တဲ့အတွက် ဘိုထိုင်နောက်မှီနဲ့အထိုင် (toilet seat) ကို အသစ်ဝယ်လာခဲ့လိုက်ပါတယ်။ နဂိုရှိတဲ့ဟာ ဖြုတ်ပြီး အသစ်တပ်လိုက်ပါတယ်။ 

နောက်ပြီး ရေချိုးခန်းနဲ့ အိမ်သာအနှံ့ကို ဟေက Mr Care လို အားပြင်းပြီး ထိရောက်တဲ့ ချေးချွတ်ဆေးကို အသုံးပြုပြီး တိုက်ချွတ်ပေးပါတယ်။ အရင်ဆုံး ဒီ Mr Care ချေးချွတ်ဆေးကို ရေချိုးခန်းရော (ရေကန်ထဲမပါ)၊ အိမ်သာအနှံ့ရော အရင်ဖြန်းထားပြီး၊ (၁၅) မိနစ် နာရီဝက်လောက် ထားလိုက်တာပေါ့။ ပြီးတော့ ဘရက်ရှ်အကြမ်းနဲ့ တိုက်ချွတ်လိုက်တဲ့အခါ သန့်ရှင်းပြီး အနံ့ကင်းတဲ့ ရေချိုးခန်းနဲ့ အိမ်သာလေးကို ရရှိသွားပါတယ်ရှင်။

 

၄။    မီးဖိုချောင်

မီးဖိုချောင်ကလည်း အရေးကြီးတာပါပဲ။ ဘေစင်၊ ပန်းကန်တွေ တင်တဲ့စင်၊ ဘူးတွေ၊ ခွက်တွေထည့်တဲ့ ဗီရိုတွေ၊ ရေခဲသေတ္တာ၊ ဟင်းချက်တဲ့ မီးဖို (microwave, hot plate စသဖြင့်) စတဲ့ အားလုံးကို ဟေသုံးတဲ့ အီလန် ဆပ်ပြာရည်လိုမျိုးသုံးပြီး ဆေးကျောတိုက်ချွတ်ပေးဖို့ လိုအပ်ပါတယ်။ ဆေးချောတိုက်ချွတ်ပြီးရင်လည်း ရေစင်အောင် အဝတ်နဲ့ ပြန်သုတ်ပေးဖို့ လိုအပ်ပါတယ်။

နောက်ပြီး ဘူးတွေ ခွက်တွေ မထားခင်၊ ထားမယ့်နေရာမှာသတင်းစာခင်းပေးထားရင် နောက်ဆို သန့်ရှင်းရေး သိပ်လုပ်ဖို့ မလိုတော့ပဲ၊ သတင်းစာ အသစ်တွေ လဲပေးရုံနဲ့ အဆင်ပြေသွားမှာပါ။ (ဒါလည်း ဟေ့ရဲ့ ကိုယ်တွေ့…)

ရေခဲသေတ္တာဆိုရင်လည်း သန့်ရှင်းတဲ့ အဝတ်စ တစ်ခုခုနဲ့ သေချာ သုတ်ပေးပြီး သန့်ရှင်းနိုင်ပါတယ်။

 

၅။    ကြမ်းပြင်ကို ပြောင်နေအောင် သုတ်

ကြမ်းပြင်ကို သန့်ရှင်းမယ်ဆိုရင်တော့ Steam Mop ဆိုတဲ့ ကြမ်းတိုက်သုတ်ဖတ်နဲ့ ဒီ Mr Care နဲ့တွဲပြီး တိုက်တာက အသင့်တော်ဆုံးဆိုတာကို ဟေတွေ့ထားပါတယ်။ Steam Mop နဲ့ဆိုရင် သစ်သားကြမ်းခင်း၊ ပါကေး၊ ကြွေပြား ဘာပဲဖြစ်ဖြစ်၊ သန့်ရှင်းရတာ အင်မတန်မှလွယ်ကူပါတယ်။ Steam Mop မဟုတ်ပဲ ရိုရိုး ကြမ်းသုတ်ဖတ်နဲ့ဆိုရင်လည်း ရတော့ ရပေမယ့်၊ သူကတော့ အားနည်းနည်း ပိုစိုက်ရမှာ ဖြစ်ပါတယ်။ ကြမ်းသုတ်ဖတ် အဝတ်ကို  စိုရွှဲ မနေစေပဲနဲ့ နည်းနည်းကလေး စိုရုံအနေအထားနဲ့ တိုက်ချွတ်သန့်ရှင်းရမှာ ဖြစ်ပါတယ်။ ပြီးရင်တော့ ရေစိုနေတဲ့ ကြမ်းပြင်ကို အဝတ်စ တစ်ခုခုနဲ့ ရေခြောက်အောင် ပြန်သုတ်ပေးဖို့လိုပါတယ်။

 

ဒီလောက်ဆိုရင်တော့ ဟေ့ရဲ့ အတွေ့အကြုံလေးတွေလည်း တော်တော်စုံသွားပါပြီ။ အိမ်သန့်ရှင်းရေးဆိုတော့ ဟေ့မမတွေကို ပြောချင်ဇောနဲ့ အကြောင်းအရာ စုံဖို့လည်း လိုအပ်တော့၊ ရှည်သွားတယ်။ တိုက်ခန်း အသစ်ကို ပြောင်းရွှေ့တော့မယ်ဆိုရင် ဟေပြောတဲ့အတိုင်း လုပ်ကြည့်၊ မမှားစေရပါဘူးနော်။