မီးဖိုချောင်မှာစွဲကျန်နေတဲ့ ငါးညှီနံ့ကို ဘယ်လိုဖြေရှင်းမလဲ

ဘယ်တော့မဆို မီးဖိုချောင်က အနံ့အသက် ကင်းစင်ပြီး သန့်ရှင်းနေရင် အကောင်းဆုံးပါပဲ။ ဒါမှလည်း ကျန်းမာရေအတွက် အကျိုးရှိမှာပါ။ တစ်အိမ်လုံးအတွက် ထမင်း၊ ဟင်းတွေ ချက်ပြီးတာတောင် မီးဖိုချောင်က လုံးဝ မညစ်ပတ်ဘဲ သန့်သန့်ရှင်းရှင်း ဖြစ်နေဖို့ ကျွန်မက အမြဲ သတိထားဖြစ်ပါတယ်။ ကျွန်မ မီးဖိုချောင်ဝင်ပြီးပြီဆိုရင်လည် ကိုယ့်ရဲ့ ခြေရာ၊ လက်ရာတွေကအစ မကျန်ခဲ့အောင် အမြဲတမ်း သန့်ရှင်းပြီးမှ မီးဖိုချောင်ထဲက ပြန်ထွက်ဖြစ်ပါတယ်။ ဒါမှပဲ ကျန်းမာရေးနဲ့ ညီညွတ်တဲ့ မီးဖိုချောင်ဖြစ်နေမှာပါ။

 

ဒီတစ်ခါ ပြောပြမှာကတော့ ကျွန်မလိုမျိုး ဟင်းချက်တဲ့ မေမေတွေ မဖြစ်မနေ သိထားသင့်တဲ့ အကြောင်းအရာတွေထဲက တစ်ခုပေါ့။ ငါးဟင်းချက်တဲ့နေ့မှာ ငါးတွေရဲ့ အနံတွေ စွဲကျန်နေခဲ့ရင် ဘယ်လို အနံ့ပျောက်အောင် ပြန်လုပ်ရမလဲ ဆိုတာ ပြောပြမှာပဲ ဖြစ်ပါတယ်။ အခု ကျွန်မ ပြောပြတဲ့ အဆင့်လေးတွေ အတိုင်း လိုက်လုပ်ကြည့်ရင် ကိုယ့်ရဲ့ မီးဖိုချောင်လေးက အနံ့အသက် ကင်းစင်ပြီး (ကျွန်မ ပြောချင်တဲ့) ကျန်းမာရေးနဲ့ ညီညွတ်တဲ့ မီးဖိုးချောင်လေး ဖြစ်မှာ အသေအချာပါပဲ။

 

ငါးဟင်းမချက်ခင် ငါးညှီနံ့ မထွက်အောင် ဘယ်လိုလုပ်မလဲ?

ပုံမှန်အားဖြင့် လတ်တဲ့ ငါးတွေဆိုရင်တော့ ဆိုးဆိုးရွားရွား ညှီနံ့ မရှိတတ်ပါဘူး။ ဒါပေမယ့် ညှီနံ့ပါမှာ စိုးရိမ်တတ်တယ် ဆိုရင်တော့ မချက်ခင် ငါးအစိမ်းကို နို့ထဲမှာ မိနစ် (၂၀) ခန့်စိမ်ထားရင် အဆင်ပြေပါတယ်။ အဲဒါဆို ညှီနံ့တွေလည်း ဖယ်ရှားပြီးသား ဖြစ်မှာပါ။ နောက်တစ်နည်းကတော့ သံပုရာသီးနဲ့ ဖျော်ထားတဲ့ရေနဲ့ ငါးကို ဆေးတာပါ။ စိမ်မယ်ဆိုရင်လည်း ရပါတယ်။ ဒီနည်းလမ်းကတော့ ငါးညှီနံ့ကို သိသိသာသာ ဖယ်ရှားပေးသလို ငါးရဲ့ မူလ အရသာကိုလည်း မထိခိုက်နိုင်ပါဘူး။

 

လက်မှာ ငါးညှီနံ့ စွဲကျန်နေတယ် ဆိုရင်ရော??

ငါးကိုင်ပြီးပြီ ဆိုရင်တော့ လက်မှာ ငါးညှီနံ့ စွဲကျန်ခဲ့မှာတော့ အသေအချာပါပဲ။ အဲဒါကို စတီး (စတီး ဒယ်အိုး၊ စတီး ပန်းကန် စသဖြင့်) ကို အသုံးပြုပြီး သန့်စင်ဖယ်ရှားလို့ ရပါတယ်။ ကိုယ့်ရဲ့ ငါးညှီနံ့ စွဲနေတဲ့ လက်ကို စတီးနဲ့ အရင်ဦးစွာ ပွတ်တိုက်ပြီး၊ E-Lan ဆပ်ပြာရည်နဲ့ လက်ကို သေချာ ဆေးကြောလိုက်ရုံပါပဲ။ (ဒါနဲ့ ဒီနည်းက ကြက်သွန်ဖြူအနံ့ စွဲနေရင်လည်း ပျောက်အောင် လုပ်လို့ရပါသေးတယ်နော်။)
နောက်တစ်နည်းကတော့ လက်ကို သံပုရာခွံ၊ ဒါမှမဟုတ် ဗီနီဂါကို အသုံးပြုပြီး ဆေးကြောတာပဲဖြစ်ပါတယ်။ သုံးပြီးသား သံပုရာသီး အခွံနဲ့ လက်အနှံ့ ပွတ်တိုက်ပေးပြီး E-Lan ဆပ်ပြာရည်နဲ့ ဆေးကြောခြင်းက ငါးညှီနံ့ စွဲနေတာကို ဖယ်ရှားနိုင်ပါတယ်။ (သတိပြုရန် : လက်မှာ ရှရာ တစ်ခုခု ရှိနေရင်တော့ ဒီနည်း (၂) ခုလုံးကို ကျွန်မကတော့ မလုပ်စေချင်ပါဘူး။)

 

ရေခဲသေတ္တာမှာ စွဲနေတဲ့ ငါးညှီနံ့ကို ဘယ်လို ဖြေရှင်းလို့ ရမလဲ?

ငါးကို ရေခဲသေတ္တာထဲမှာ ထည့်သိမ်းမယ်ဆိုရင်တော့ ငါးညှီနံ့ စွဲကျန်ခဲ့မှာတော့ အသေအချာပါပဲနော်။ ဒီလို စွဲကျန်ခဲ့တဲ့ ငါးညှီနံ့ကို ဘယ်လို ဖြေရှင်းရမလဲ ဆိုတာကို အခု ကျွန်မက ပြောပြပေးမှာပါ။ အရင်ဆုံး ငါးကို ရေခဲသေတ္တာထဲ သိမ်းမယ်ဆိုရင် လေလုံတဲ့ အလုံပိတ်ဘူးထဲကို ထည့်ပြီး သိမ်းပေးရမှာ ဖြစ်ပါတယ်။ ဒါမှ ငါးညှီနံ့က ဆိုးဆိုးရွားရွား စွဲမကျန်ခဲ့မှာပါ။ မုန့်ဖုတ် ဆိုဒါ မှုန့်က အနံ့စုပ်နိုင်တဲ့အတွက် ရေခဲသေတ္တာထဲမှာ မုန့်ဖုတ် ဆိုဒါ ထားထားမယ်ဆိုရင်လည်း အဆင်ပြေနိုင်ပါတယ်။

 

နောက်ပြီး အခု ပြောပြတဲ့ အဆင့်တွေအတိုင်း လိုက်လုပ်မယ်ဆိုရင် သင့်ရေခဲသေတ္တာထဲက အနံ့တွေကိုပါ ဖယ်ရှားပြီးသား ဖြစ်မှာပါ။

 

၁။ ရေခဲသေတ္တာထဲ သိမ်းထားတဲ့ အစားအသောက်တွေကို အကုန်ရှင်းထုတ်လိုက်ပါ။ အံဆွဲတွေ၊ ဗန်းတွေကိုပါ ထုတ်လိုက်ပါ။    

၂။ ပန်းကန်ဆေး ဆပ်ပြာရည် အနည်းငယ်နဲ့ မုန့်ဖုတ်ဆိုဒါတွေကို ရေနွေး တစ်လီတာနဲ့ ရောဖျော်ပါ။ ကျွန်မကတော့ E-Lan ကို အမြဲလို သုံးပါတယ်။   

၃။ ဖျော်ထားတဲ့ ဆပ်ပြာရည်ကို ဖော့တုံး သုံးပြီး ရေခဲသေတ္တာအနှံ့ ပွတ်တိုက်ပေးပါ။ အနံ့ပိုစွဲနေတဲ့နေရာကို ပိုတိုက်ပေးပါ။

၄။ ပြီးရင် လက်သုတ်ပုဝါ ဒါမှမဟုတ် အဝတ်စ တစ်ခုခုနဲ့ ရေခဲသေတ္တာကို ခြောက်သွားအောင် သုတ်ပေးပါ။

၅။ ရေခဲသေတ္တာကို ပိတ်ထားပြီး လုံဝ ခြောက်သွားအောင် စောင့်ပါ။ ပြီးရင်တော့ အံဆွဲတွေ၊ ဗန်းတွေ သူ့နေရာနဲ့ သူပြန်ထည့်နိုင်ပါပြီ။

ဒီလောက်ဆိုရင်တော့၊ ငါးညှီနံ့ကို ဘယ်လို ဖြေရှင်းရမလဲ သိလောက်ပြီပေါ့နော်။ ငါးဟင်းချက်တဲ့နေ့တွေဆိုရင်လည်း ငါးညှီနံ့ကျန်ခဲ့မှာ စိတ်ပူစရာ မလိုတော့သလို ရေခဲသေတ္တာထဲမှာ ငါးကို သိမ်းထားမယ်ဆိုရင်လည်း စိတ်ချလက်ချ သိမ်းလို့ရပြီပေါ့။ ဒါဆို ဟင်းချက်ပြီးရင်တောင် အနံ့အသက်ကင်းတဲ့ မီးဖိုချောင်လေး ဖြစ်နေမှာ အသေအချာပါပဲ။ ဒါမှလည်း ကျန်မာရေးနဲ့ ညီညွတ်တဲ့ မီးဖိုချောင် ဖြစ်နေမှာပါ။